ಹಾರರ್ ಹನಿಗತೆಗಳು

ಅವಳು ಅಲೋನ್ ಅಲ್ಲ!

ಅವತ್ತು ಅವಳು ಒಬ್ಬಳೇ ಮನೆಯಲ್ಲಿದ್ದಳು. ತನ್ನಷ್ಟಕ್ಕೇ ತಾನೇ ಅದ್ಯಾವುದೋ ಸಾಂಗು ಗುನುಗುತ್ತಿದ್ದಳು.
ಅವಳ ಬೆನ್ನ ಹಿಂದೆ ಯಾರೋ ವಿಕಾರ, ಕ್ಷೀಣ ಧ್ವನಿಯಲ್ಲಿ ಇವಳೋಟ್ಟಿಗೆ ಹಾಡಿನಲ್ಲಿ ದನಿ ಸೇರಿಸಿದ ಹಾಗನ್ನಿಸಿತವಳಿಗೆ. ಗಾಬರಿಗೊಂಡು ತಿರುಗುವಷ್ಟರಲ್ಲಿ ಕರ್ರಗಿನ ಆಕೃತಿಯೊಂದು ಅವಳ ರೂಮಿನಿಂದ ಸರಿದು ಹೋಗಿದ್ದು ಕಾಣಿಸಿತು. ಆಕೆ ಬೆಚ್ಚಿ ಹಾಲ್‌ಗೆ ಬಂದು ನೋಡಿದಳು. ಅಲ್ಯಾರೂ ಕಾಣಿಸಲಿಲ್ಲ. ಮನೆಯ ಡೋರ್ ಒಳಗಿನಿಂದ ಲಾಕ್ ಆಗಿದ್ದ ಸ್ಥಿತಿಯಲ್ಲೇ ಇತ್ತು. ಆಕೆಯ ಮುಖ ಭಯದಿಂದ ಬಿಳುಚಿಕೊಂಡಿತು!

*******

ನಿಂಬೆಹಣ್ಣು, ಬಿದಿರಿನ ಬುಟ್ಟಿ

ಸುಂಡೇಕೆರೆಯಿಂದ ಬೇಲೂರಿಗೆ ಹೋಗುವಾಗ ಸಿಗುವ ಸ್ಮಶಾನ ದಾರಿಯಲ್ಲಿ ಯಾರೂ ಅಡ್ಡಾಡುವುದು ಕಡಿಮೆಯೆ. ಆದರೆ ಅವತ್ತು ಬಸಪ್ಪಣ್ಣ ಯಾರ ಮಾತಿಗೂ ಕೇರ್ ಅನ್ನದೆ ಅದೇ ಮೂರುದಾರಿ ಸೇರುವಲ್ಲಿ ಕತ್ತರಿಸಿ ಕುಂಕುಮ ಹಚ್ಚಿದ್ದ ನಿಂಬೆಹಣ್ಣು, ಹೂವು, ಸಣ್ಣ ಬಿದಿರಿನ ಬುಟ್ಟಿಯನ್ನೆಲ್ಲಾ ದಾಟಿಕೊಂಡೇ ಹೋದ. ಮಾರನೆಯ ದಿನ ಬಸಪ್ಪಣ್ಣ ರಕ್ತ ಕಾರಿಕೊಂಡು ಸತ್ತ ಸುದ್ದಿ ಸಿಕ್ಕಿತು!

-ಸದಾ ಸಕಲೇಶಪುರ